الأحد، 27 سبتمبر، 2009


عنوان المدونة

أول ما عملت المدونة سمتها الليل لاقيت اسمها

ممممممممللللللللللللل موت قولت اغيرة جبت ورقة بيضا وقلم

رصاص مبرى وكباية نسكافية ونور اصفر زى بتاع

العفاريتعلى رأى طنط إيناس وقفلت الباب وبدأت خطة وضع

الأسم وهذه بعض الأمثلة مرفقة لسيادتكم للبت فيها وإعادة

النظر...؟(هبلة رسمى)

· غروب روح

·

· أبيض وأسود

·

· ميدان الليــل

·

· فراشـــــــة

·

· سطــــور

·

· كشكول سـلك

·

· فتاويل (اللى بتقع وانا بناكل )

·

· طيور العقل ذكريات الحاضر

·

· فتافيت قلب

·

ومش عاوزة اسمع (فتافيت الحياة حلوة)

وبعد فحص ومحص تم أختيار الأسم لأعلنه للناس فى

ساعاته وتاريخه............... وهو الاسم التاريخى جبنة

قريش أى بمعنى أخر 2aresh cheese

وسبب تسميتى للمدونة كده

........................................................ شوف اللى جاى

ريهام رضوان




عنوان المدونة 2

بعشق القريش ياجدعان وياسلام عليها بالزيت والقوطة (مش

الطماطم لأ القوطة) ولا بالشطة ولا بالنعناع يا سلام بقى لو

تجيب ( ركز فى اللى جاى ) رغيش بلدى وتفصل وشه عن

ضهره وتسخنه يبقى ناشف وتجيب الجبنة عليها قوطة وجنبها

طرنشات خيار (يفضل انك تقرش مباشرة) وكل يا معلم.

وياحبذا لو فيه عودين كسيرة خضرا وبقدونس .( واالله جعت)

فى الاعدادية كان ليا صاحبتى مامتها كل يوم تديها جبنة

قريش بالزيت وهى تقولى انا مبحبش القريش ( زهقت

ياريهام تيجى نبدل ) وطبعا بوافق ... وإلى الان لا اصدق ان

حد يكره الجبنة القريش

· ملحوظة للقراء الاعزاء رغم الحكى ده كله بس انا

·

· رفيعة يعنى بلاش الخيال يشتغل

ريهام رضوان


ذات يوم..

ذات يوم ... (حلوة ذات يوم دى) ف مرة كان عندى حوار فى

قهوة الحرية مع شاعر المهم قاللى تشربى إيه فلت بيبسى راح

قاللى طب ممكن أطلب إستيلا قلت عادى ما انا اتعزم عليا

ببيرة وسجاير قبل كده وكنت فى قصر ثقافة تخيل .

ماكانش مصدق وقاللى لازم تحكيلى ....

يومها مديرة القصر فضلت تقولى دى ساقعة وحلوة يابنتى

اشربى دى بتخسس وانا اصلا عود قصب وانا على كلمة

واحدة لا ثم لا ثم لا . طب خديها معاكى .....لا وفين وفين لما

عرفت أهرب منها.

وبعد شوية جاءت صديقه للشاعر وطلبلها إستيلا قلت عادى,

شوية وحصلت خناقة قاللى ان سببها ان الامور اللى بيتخانق

شرب كتير لغاية ما نسى وفوجئ بالحساب .

قلت بس دى باظت بيرة وخمور مش كفاية السجاير .

بصوا الدستور بيدى الحق لكل مواطن أنه يشرب بس ملكش

دعوة بغيرك زى الست المستفزة اللى حلفت لاشرب بيرة بس

الحمد لله انى قاومت ومضعفتش .

ريهام رضوان



خيار العيد...؟

وأنا صغيرة كنت باسمع تكبيرة العيد وانا نايمة واصحى على

صوت المصلين, أجرى أقف فى البلكونة و أتفرج و لازم

يكون فى إيدى خياره......!

ساعتها بس أحس إن العيد جه.

لما كبرت وبقيت أنزل أصلى العيد مبقتش أحس بيه لأن

مفيش خيار ولا بلكونة ولا ناس بتجرى بجلاليب بيضا تلحق

الصلاة.

· إللى جنبه جامع يقف فى البلكونة يسمع الصلاة وياكل

·

· خيار ويتفرج , صدقونى فيها فرحة حلوة ببرد الصباح..

· ملحوظة:- جربوا الخيار مع الشاى باللبن مش شرط

·

· يستنى العيد بس بشرط (محدش يقول عليا عكاكة)

ريهام رضوان



الخنفســـــــــــــة

خنفسة.... خنفسة..... موتها يا أحمد , كنا عيال بنلعب فى

الشارع أنا وأخويا وبنات خالتى وشوفنا خنفسة طبعا خوفنا بس

على مين موتناها لأ والأحلى إننا دفناها (أه والله) شوفتوا حد

بيعمل كده دلوقتى.

حفرنلها حفرة ودفناها تعرفوا ليهوقتها كنت واخدة درس علوم

بيتكلم أن الحيوانات بعد دفنها بملايين السنين بتبقى بترول قلت

بس أوفر بترول للبلد وأبقى من العظماء وبما إنى الكبيرة وأل

عندى معلومات قولتلهم تعالوا ندفنها عشان تتطلع بترول (هبلة)

المهم حفرنا ودفنا ورشينا مية (إكرام الميت دفنه)والأدهى إننا

وقفنا صف أمام المأسوف عليها نقرا الفاتحة.

وعزلت خالتو من المنطقة بس كل ما واحد فينا يعدى يقرا الفاتحة

على الخنفسة رغم إننا كبرنا وفهمنا بس دى طفولتنا البريئة إللى

عمرنا ما هننساها...

ريهام رضوان



حادى بادى

ترتبط ليلة العيد معى مثل غيرى بصوت سومة ... يا

ليلة العيد أنستينا لكن العيد ده سمعت ( حادى بادى

حادى بادى فيه صوت كده جاى من الناحية دى لا لا لا

ده من الناحية دى عمال بيغنى وينادى نوو نوو نوو ....

فتسمرت مكانى مستغرقة بكلمة ياااااااااااااااااااااه طويلة.

فذكريات طفولتى مع العيد عملوا Mix حلو .

ساعتها كنت فى الشارع أول ما روحت طلعت دبدوبى

المفضل (أول دبدوب جالى كان عندى سنة) وتنحت فى

طفولتى إللى وحشتنى جدا.....

ريهام رضوان