القدير أبو رية

أول مرة قابلته كان عندى برد بس لازم اعمل الحوار إتقابلنا

فى الاوبرا وعشان الكافتيريا زحمة وقتها كان مؤتمر الرواية

قعدنا عند المسرح المكشوف والهوا من كل ناحية يومها

اطرافى اتجمدت وايدى وقفت (كنت بسجل بالموبايل) وانفى

اتزكمت بس أحلى حاجة إن يوسف ابو رية كثير الكلام فى

حواراته ومش بيحتاج اسئلة كتير .

وعملت الحوار وبعد فتره عملت حوار تانى لانى رحت

جريدة تانية , بس المرة التانية اتقابلنا فى جروبى الساعة

10الصبح وكنت اول مرة ادخله .

تشربى ايه طبعا رديت نسكافية وفوجئت بالنادل ( حلوة النادل

دى)جايب صينية عليها البراد واللبلانة والسكر وبكاوى

النسكافية يامعلم ( تحبى تاخدى حاجة معاه؟) يوسف يسأل

(لا مرسى كفاية النسكافية.) أنا أجيب .

عملت الحوار نزل تانى يوم علطول وبلغته واستمرت علاقة

بيننا من بعيد لبعيد يعنى ابعت رسالة فى الاعياد والمناسبات

يرد برسالة.

وفجأة سمعت خبر وفاته فى الطبعة الاولى مع احمد

المسلمانى تنخت وجريت اتصل بيه زوجته ردت عليا اكدتلى

الخبر فعزيتها وقفلت وعيطت كتير ومن يومها مش راضية

اخش جروبى تانى عاوزة احتفظ بذكرى ابو رية هناك.

استاذ يوسف شحص رائع اخبرنى فى احدى المرات انه فى

شغله محدش يعرف انه كاتب ولا فى بلده حتى لا يحجم

الاخرون كتاباته او يبحثون عن انفسهم بداخلها .

مات الاستاذ وهو يطلب علاجه على نفقة الدولة وتمت

المرافة على طلبه بعد موته........؟

رحمك الله يا استاذ فى بلد لم ترحم احدا.

ريهام رضوان

سي عمر طاهر

كان عندى مع عمر طاهر فجمعت معلومات عنه ولاقيت ناس كتيره قالت عنه مغرور قلت وانا مالى , المهم حضرت الاسئلة وكلمته وإبتدينا الحوار بس حوار تليفونى وبدأت أولا الأسئلة معجبتهوش بحجة إنها قديمة وإتسألها قبل كده والمفروض إنى إقرأ كتبه وأتعمق (حاولى تحسنى حواراتك) .

المهم أنه جابلى إحباط متوحش وبعد ما قفلنا الخط رجع إتصل وإعتذر وأهدالى كتبه وقرأتها وعملت الحوار, ليه عملته مش عارفة حاجه جوايا قالتلى اعمله.

قمت بعمل حوارات مع كثيرين مع كتاب وملحنين وشعراء يفوقوا عمر كثيرا ولم يعترض أحدهم من قبل بل العكس ولذلك فرأى عمر حطمنى.

ده أولا ,أما ثانيا فبعد حوارى معاه شاهدته فى برنامج تليفزيونى وإتسأل أسئلة فيها كتير من الأسئلة إللى معجبتهوش معايا ولاقيته جاوب وهو مبسوط وعادى.....

إشمعنى ياعم عمر ولا عشان تليفزيون ياعم , فعلا عمر مغرور, أنا معاه أنه كتب اشكال مختلفة شعر و ترجمة و افلام و كارتون ( امسكوا الخشب ) بس برضه في عظام كتير مش مغرورين مثلاً الموسيقار العبقري عمر خيرت راجل نقي و جميل جداً و لم أشعر قط بغرور منه.

تعجبني كتاباتك يا عمر و لكن......

ريهام رضوان

منذ تركى للعمل الصحفى لم أقترب لأى مكان قمت فيه بحوار فذكريات تلك الأماكن مرتبط بعملى الذى أقدسه رغم تركى له وأتمنى كل لحظة العودة له ولكنى جبانة أخاف الفشل.....

وسط البلد-باب اللوق-الخن-طلعت حرب-جروبى-الأوبرا-كافتيريا المجلس الأعلى للثقافة وأكثر ما يربطنى بها فنجان النسكافية (أعشقه).

أماكن أطوف بها فى عقلى أخاف الذهاب إليها فأنا كالتى هجرها المحبوب.

الخن أرتبط به جدا,مكان خاص قهوة صغيرة بداخل حارة بطلعت حرب,أول مرة ذهبت فيها لأقابل أستاذى مصطفى الجارحىيومها قاللى (أحلى حاجة بيعملوها هنا القرفة باللبن أجبلك) ووافقت.

ذكريات عادية ولكنها لى رائعة ,محزنة,مبكية....

ريهام رضوان

صورة مين دى...؟

دخلت فصل أولى إبتدائى وبعد ما خلصت شرح قلت نلعب شوية جت فى دماغى أسألهم صورة مين المعلقة فوق السبورة )طبعا كلكوا عارفين مين ف الصوة( سألت كل واحد لوحده الراجل ده بيشتغل إيه وكانت المفاجئة كالتالى –

ياميس ده مدرس ف المدرسة , لا ده شغال فى المكتبة , لا ده مهندس زراعى ,ده رئيس الوطن العربى , ده رئيس الدنيا , ده رئيس الوزرا , ده ملك مصر, ده رئيس جمهورية مصر )أخيرا حد عرف( .

طيب بتشوفوه ف التليفزيون –

لا التليفزيون بتاعنا مش بيجيبوا خالص , إحنا بقى ياميس كل ما نفتح التليفزيون نشوفوا كتييييييييير....

وإجابات عجيبة سمعتها مقدرتش أمسك نفسى من الضحك على براءة أطفال أفتقدتها مع الكبار ...

ريهام رضوان

خيار وفقوس

موضوع أخر جذب إنتباهى

وهو أن لكل مدرسة خاصة كتاب إنجليزى مستوى رفيع بجانب كتاب الوزارة ده معروف إنما اللى مش طبيعى ان كتاب المستوى يختلف من مكان لمكان مع ان المدارس كلها خاصة ومن نفس النوع والمستوى والمكان طيب ليه هى تجريبى ولا خاصة , المفروض ان المدارس الحكومية كتابها موحد ماشى ,المدارس الخاصة بتزود مستوى رفيع ماشى واللغات معروفة انما ليه المستوى يختلف من مدرسة للتانية ,للدرجة دى وصل بينا الجهل والتخلف وبقى الكل ماشى بدماغة

لا والجديد ان ساعات المدرسة تغير من كتاب للتانى طيب واللى خدوا على نظام معين والمصيبة ان لكل كتاب طريقة وشرح .

بجد التعليم عندنا مليان بلاوى ياجماعة التقدم مش معناه اننا نشيل فوق طاقتنا ,لا احنا ممكن نتقدم لو فكرنا بعقلنا مش بتقليد اعمى لاى حاجه جاية من بره ارحموا اطفال بكره مش كفاية جبتوا عقدة للكبار خلونا نطلع جيل فاهم مش مقهور وفيه تفرقة بينهم ,

المفروض المدارس الحكومية واحده والخاصة واحده واللغات واحده وكل واحد ومستواه حرام عليكوا العيال هما اللى بيتعذبوا انتوا مش حاسيين بحاجه .

كفاية قاعدة مكاتب وقرارت معقدة انزلوا شوفوا الواقع sorry الطين)مينفعش أقول غير كده( .

ريهام رضوان

الموجهة ويومها...

أول ما إشتغلت ف المدرسة إستنيت موجهة المادة عشان أعرف إيه هي واجباتي ودي كانت أول وأخر مرة استناها لأن اليوم إللي بتيجي فيه بيبقي نكد ودايما تلاقي حاجة غلط حتي لو مفيش تطلعي حاجه من تحت الأرض .

المشكلة مش ف الموجهة بس, المشكلة في إللي أعلي منها ،ناس قاعده علي مكاتبها ولا هممها حاجه ،خلوا المدرس يحضر بالطريقة دي وبعدها بأقل من شهر يقولك لأ إلغي الطريقة القديمة وخد الجديدة دي (طب والله ده حصل) والمشكلة إن كل طريقة أصعب من إللي قبلها ومعقدة موت طب المدرس الغلبان ده هيشرح ولا هيعلم كراسات ولا نشاطات ولا يحط إمتحانات ويعلمها وبعدين يرصد عشان يختار أعلي درجة ولا يحضر كشكوله ،ده كوم وتحليل المنهج وأهدافه حاجه تانية والله ولا له أي لازمه بنعملوا ليه معرفش؟

غير كده تلاقي الموجهة ست جاية من عصر تاني(فاصلة) معندهاش أي إحساس إبداعي أو فني أنا حاسه أن كل مهمتها إنها تجيب للمدرسين إحباط, بجد بتحسسني إني مهما عملت مقصرة .

نفسي ألآقي حد مهتم بالموضوع بجد يحس بمسؤلية أجيال يحسوا بمدي فداحة أفعالهم وبعدها التام عن تحسين مستوي التعليم.

مش كفاية علينا المدير والناظر والوكيل والأطفال كمان موجهين إرحمنا يارب.....

بجد الموضوع محتاج وقفة ياجماعة ياريت يكون الموجهة دى شخص مبدع متطور لأن الموجهين بجد محبطين جدا وساعات بحس ان عندهم نقص وبيطلعوه فينا المفروض الموجهه توجه المدرس مش تحبطه وتشجعه انه يبقى احسن انما دى اسلوبها بيجبلى احباط... نفسى أقولها أرجوكى كفاية حسى بالناس شوية وخصوصا بالمدرسين اللى بتشرفى عليهم.....

ريهام رضوان

K. G 1

بعد تركى العمل فى الصحافة عدت لمهنتى الأصلية وهى

التدريس , فى بداية عملى واجهت صعوبات فى التأقلم بداية

من الأستيقاظ المبكر مرورا بالصوت العالى والزعيق وبس

واسكت ويابنى حرام عليك وهكذا...

ولأنى أدرس لمراحل مختلفة فانا ادرس اللغة الإنجليزية

للصف اولى حضانة واولى ابتدائى ودراسات اجتماعية

للصف الرابع والخامس الابتدائى والاول الاعدادى.فقد

وجدت ان لكل مرحلة مميزاتها ولكن احلى مرحلة هى اولى

حضانة فابتسامتهم تكفى لاعطاء الامل لاتعس مخلوق

,فيكفى قول العيد قفل , ميس انتى هتروحى العيد طيب ما

تيجى معانا , ميس عاوز سندوتش الكوكو, تيتة ثريا عند

ربنا , وعند اعطائهم معلومة جديدة افرح عندما يكرورها

مثل( إى ) إد بيضة بمعنى E egg تلك الكلمات اعشقها

افتقدها كثيرا فى اجازاتى لدرجة اننى قمت بتصويرهم

لاراهم معى فى المنزل .

العب معهم ونغنى يابطة ياسمينة , اكثر ما يحبونة هو ان

يقولوا هيييييييه بصوت عالى وهو ما يفتقده الكبار وهو

الصراخ بصوت عالى لافراغ ما بداخلنا من طاقة فاقول معهم

هيييييييييييييييه لافرح مثلهم ولاستعيد احلى سنوات

العمر وهى K . G 1.

ريهام رضوان